حالة من يأس

السلام عليكم ورحمة الله وبركاته

معظم المدونات اللى قرأتها كانت غير شخصية على عكس مدونتى انا عملتها مخصوص عشان احكى فيها ما بداخلى لانى طول عمرى بسمع بس للناس وعمرى ما حكيت لحد همومى عشان كده المدونة دى هيا شخصيتى الحقيقية بعيدا عن الهزار والروح الجميلة والشخصية المرحة واحتواء الاشخاص

حاولت اكتب فى ورق كل اللى بيدور جوايا لكن فشلت لانى لا بحب القراءة ولا الكتابة فكانت الكتابة ضغط عليا وزهقت بسرعة

لكن بحكم انى بقعد على النت كتير فكتابة الكاى بورد بالنسبالى سهلة

المهم

تصدقونى لو قلتلكم ان حياتى ممكن تتعمل فيلم ؟ غريبة صح

مع صغر سنى شوفت حاجات كتير وتعبت من حاجات كتير وكان ليها تأثير شديد على شخصيتى

اللى يشوفنى من برة يفتكرنى معنديش هموم من كتر الضحك والهزار وكمان يفتكرنى قوية لكن الحقيقة عكس كده بكتير

اى موقف بتحط فيه بكتشف انى عبارة عن ورقة الرياح ممكن توديها بعيد وبردو الشيطان ساعات كتير بيلعب بأفكارى

دايما بفكر كأخت عمرى ما بفكر فى اللى ليا فلان عمل فيا كذا فلانة عملت فيا كذا لاء عمرى مافكرت من المنطلق ده كل اللى بفكر فيه يا ترى انا عملت فيهم ايه وهل انا صح او غلط

بس ساعات الواحد بيتحط قدامه فى طريقه ناس لحكمة معينة وكمان بيتحط فى مواقف وبياخد قرارات سريعة يندم عليها

عمر ما كان التسرع اسلوبى فى التفكير انا عصبية اه وده عيب فظيع لكن مش متسرعة

للاسف نقطة ضعفى هيا التفكير بقلبى

لما اتحط فى موقف بيضغط على نقطة ضعفى ساعتها بتسرع فى القرار وساعتها بظلم اللى حواليا اكتر مابظلم نفسى

مسيطرة عليا فكرة الموت من حوالى اسبوعين

حاسة انى مسببه متاعب كتير لكل اللى حواليا

بقيت عبء على كل اللى حواليا

مبثمرش شئ فى حياتى

من الاخر مليش اى لازمة

بل بالعكس وجودى اتعس وعذب وآلم ناس كتير

واختفائى من الحياة هايريح ناس كتير

بس معتقدش انو هايريحنى لانى خايفة من لقاء ربى

بجد مش عارفة اعمل ايه

انا تعبانة نفسيا جامد والتعب النفسى أثر على ومرضت فعلا

صداع ومغص وبجد مش شايفة قدامى

مخنوقة بشدة

طول عمرى لما بتعب بكلم ربنا وحده

عمرى ماشتكيت لاخت همى ولا حتى حاولت ادور على حد اكلمه وقت حزنى

لكن امبارح انا كنت منهارة وكان ممكن يجيلى انهيار عصبى ومكنتش عارفة اعمل ايه قعدت ادعى واستغفر ولاول مرة رفعت سماعة التليفون ورنيت على اخت من الاخوات لعلها تكون صاحية لكن للاسف مردتش عليا الا بعدها بنص ساعة بعد ما خلاص كنت هديت كلمتها وحكيتلها شوية ووصيتها تدعيلى

بالله عليكم انتوا كمان ادعولى واستغفرولى لان

والله لو مت انا لارتاح العالم كله

اللهم توفنى اذا كانت الوفاة خير لى .... ولمن حولى

عند فراق الأحبة

السلام عليكم ورحمة الله وبركاته

لحظات الوداع صعبة

اكيد كلنا عارفين كده واكيد محدش فيكم لم يعش هذه اللحظة كلنا عيشناها
بس كلما اقترب الحبيب من قلبك كانت لحظة فراقه اصعب
واكيد فراقه فى الدنيا وهو عايش اقل بكثير فى صعوبتها من فراقه وانت فى دار وهو فى دار اخرى
واصعب اللحظات لما تمر عليك الساعات بالثوانى وتدق الثوانى مع دقات قلبك فى انتظار شئ معين
وتدعو الله عز وجل من اعماق قلبك ان يجعل ما تنتظره خيرا

احساس صعب بعيشه هذه الايام

اختلطت عندى المشاعر فأصبحت لا اعرف مشاعرى
هل كل مانقوله هو شعارات فقط ؟؟؟ ولما ييجى الجد نبقى زى شوية ورق الهوا بيطيرهم
والافظع ان الاحوال فى مصر وفى العالم تحزن أكثر

فيزداد عندى الهم فوق الهم


إلى متى سنبقى كذلك ؟؟



هل ترانى نلتقى أم أنها

كانت اللقيا على أرض السراب

ثم ولت وتلاشى ظلها

واستحالت ذكريات للعذاب


والشئ الوحيد اللى بيصبرنى هو تذكر هذه الآية

> وَلاَ تَهِنُواْ فِي ابْتِغَاء الْقَوْمِ إِن تَكُونُواْ تَأْلَمُونَ فَإِنَّهُمْ يَأْلَمُونَ كَمَا تَأْلَمونَ وَتَرْجُونَ مِنَ اللّهِ مَا لاَ يَرْجُونَ وَكَانَ اللّهُ عَلِيماً حَكِيماً >
النساء 104


عذرا انى كتبت اشياء غير مفهومة

ولكنى فعلا

اختلطت عندى المشاعر

مفيش

السلام عليكم ورحمة الله وبركاته

منتظرين انى اكتب ايه

مفيش طبعا

سمعت عن المدونة من حوالى شهر كده

وعجبتنى جدا

بس لانى مش بحب القراءة وعليه فمش بحب الكتابة

فطنشت الموضوع

بس لما قريت مدونات كتير حبيت اعلق عليها فكان لازم اعمل اسم عشان اعلق

ومادام عملت الاسم يبقى اعمل مدونة

انا مش هاكتب احداث سياسية ولا اجتماعية ولا مشاكل ولا ايجابيات ولا سلبيات

كل اللى هاكتبه خواطر

اتمنى انها تحوز اعجاب قارئيها

سلام عليكم